सो व्हॉट ? सो व्हॉट ?

वर्तमानाच्या पाठीला भूतकाळ हा चिकटून असतोच असतो. त्याची 'अनुभवाची काठी' करुन रोजचं जगणं सुखकर करायचं असतं, खरंतर. पण काहींच्या बाबतीत होतं भलतंच. त्यांच्या अनुभवांची काठी न होता, त्याचं होतं भलंमोठ्ठं गाठोडं ! सुखदुःख्खाच्या प्रसंगांनी कोंबून भरलेलं !! त्याच्या ओझ्याखाली दबून जात, ओढग्रस्त जीवन जगत असतात बिच्चारे ! त्यात परत, एखादा चटका लावणारा कटू प्रसंग, होऊन बसलेली असते भळभळणारी जखम. शोभा गुर्टुच्या ''उघड्या पुन्हा जहाल्या... जखमा उरातल्या'' गाण्यासारखी. त्याची खपली निघत असते अधून मधून, वर्तमानाला रक्तबंबाळ करणारी !

तर, आजच्या कथेतली आपली नायिका आहे नामांकित वकील. पुरुषी अत्याचाराला बळी पडलेल्या पीडित स्त्रियांची बाजू घेऊन त्यांना न्याय मिळू देऊ पाहणारी. दारुड्या नवऱ्यामुळे संसार उघडा पडलेल्या, उच्चभ्रू, यशस्वी उद्योजक पतीच्या बाहेरख्यालीपणामुळे त्रस्त झालेल्या, नपुंसक, नामर्द जोडीदारामुळे वैफल्य ग्रस्त झालेल्या. अशा साऱ्या सख्यांच्या, घटस्फोटाच्या केसेस यशस्वीपणे लढणारी.

पण हाय रे दैवा ! तिच्याही पाठीवर असतं, ते वर वर्णन केलेलं गाठोडं. त्यातली तीच्या बालपणीची, स्वतःवरचा बलात्काराच्या प्रसंगाची जखम भळभळत असते. त्यामुळे तिचं आणि पर्यायाने तिच्या नवऱ्याचं, अर्थात आपल्या कथानायकाचं 'सेक्सलाईफ' ही समस्या बनलेलं. सायकॅट्रिस्टकडे ट्रीटमेंट सुरु असते. झालेल्या बलात्काराचा प्रसंग तिनेच तपशीलवार लिहून काढणे, मनावर तीव्र आघात केलेल्या प्रसंगातली धार बोथट होईपर्यंत ! हि असते ट्रीटमेंट !!

ह्या सगळ्यात नवऱ्याची होणारी मनाची घालमेल, शारीरिक उपासमार ह्यावर उपाय म्हणजे नवऱ्याने घटस्फोट घेणे, असा तीच सुचवते पर्याय. त्याला अर्थातच, नायकाचा नकार. ''प्रेम आणि सेक्सलाईफ ह्या दोन वेगळ्या गोष्टी आहेत. आणि मी मनापासून प्रेम करतो तुझ्यावर.'' नायकाचं तिला ठाम उत्तर.

मग चार-आठ दिवस दोघांनी वेगळं राहण्याचं ठरतं त्यांचं. आपला नायक त्याच्या गावी जातो रहायला. तिला जेव्हा वाटेल, तेव्हाच तिने त्याला फोन करून बोलवायचं असंही ठरतं. चार दिवसांनीच, तिचा त्याला फोन येतो. त्याच्या शिवाय करमत नसल्याचा. असं काय घडतं चार दिवसात?

दरम्यान, तिची एक केस सुरु असते कोर्टात, घटस्फोटाची. हाय प्रोफाइल केस. नवरा मोठ्या जाहिरात कंपनीचा मालक, तर बायको असते, एकेकाळची 'मिस इंडिया' !! पदरी एकूलतीएक मुलगी, मात्र ती असते गतिमंद. तिच्या जन्मानंतर पत्नी वैफल्यग्रस्त बनलेली.

नायिका केस हरते. विरोधात निकाल गेल्याने, ती बायको नायिकेच्या अंगावर धावून जाते. तिला धक्काबुक्की करते. तो नवरा तिला कसंबसं सोडवतो. थकून भागून नायिका घरी येते. बिछान्यावर अंग टाकते. सारं अंग ठसठसत असतं, मानेची वेदना असह्य होत असते. इतक्यात दरवाजा ठोठावला जातो. दारात, आजची केस जिंकलेला तो नवरा ! ती आश्चर्यचकीत !!

बोलता बोलता तो तिची मान ठीक करतो ... हलका मसाज करुन. शरीरावर असा हलका हात फिरवूंन, त्याला कुरवाळून दुखरा भाग बरा होतो. मनातल्या जखमेचं काय ? ती त्याला विचारते.

जाता जाता तो उपाय देऊन जातो. मनाच्या जखमेला असं कुरवाळत बसायचं नसतं. त्या जखमेला सहज झटकून टाकायचं, प्रश्न विचारून...

सो व्हॉट ? सो व्हॉट ?

आपलं मनच, मग बोलतं अशा कटू आठवणींना ... चल हट, चल फूट !!

गोष्ट तर आवडलेली असेलच तुम्हाला. पण ही कथा पडद्यावर तितकीच जिवंत उभी राहते आपल्यासमोर, 'फायरब्रॅन्ड’ ह्या मराठी चित्रपटातून ! कथा, दिग्दर्शन सबकुछ अरुणा राजे असलेला 'फायरब्रॅन्ड', नेटफ्लिक्सवर नक्की पहा.

anilbagul1968@gmail.com